Летняя акадэмія рускай мовы "вырасла" з Летняй школы, але заняткі ў акадэміі значна адрозніваюцца. Замежнікам быў прапанаваны зусім іншы ўзровень вывучэння рускай мовы. Тут слухачы не толькі ўдасканальвалі моўныя навыкі, але і развівалі даследчыя кампетэнцыі ў галіне прыкладной лінгвістыкі і асноўная яе мэта – стварэнне навуковага праекта.

Усе даследаванні слухачы праводзяць выключна на гродзенскім матэрыяле, што надае рабоце ўнікальнасць і аўтэнтычнасць. У гэтым годзе замежныя госці вывучалі найменні мясной і малочнай прадукцыі, што вырабляецца ў нашым рэгіёне. Яны канцэнтраваліся на тыпалогіі і семантыцы, марфалагічным складзе, шукалі заканамернасці.

Таксама ў праграме Летняй акадэміі ў студэнтаў быў чатырохгадзінны ўрок рускай мовы штодня з дасведчаным выкладчыкам. Яны прайшлі па выбары 10-гадзінны курс: "Дзелавая руская" або "Вывучэнне культуры праз мову". Акрамя гэтага, былі кулінарны майстар-клас, лекцыя па беларускай гісторыі і культуры, экскурсіі і штодзённая магчымасць практыкаваць рускую мову з беларускімі студэнтамі.

Навучанне ў Летняй акадэміі завяршылася абаронай навуковых праектаў. Усе студэнты паспяхова справіліся з напісаннем сваіх работ, таму павязуць дадому не толькі яркія ўражанні, але і якасную навуковую працу!