11-12 снежня ў сценах Гродзенскага дзяржаўнага ўніверсітэта імя Янкі Купалы пройдуць ХIV Каложскія адкрытыя абласныя навукова-адукацыйныя чытанні «Асвета і маральнасць: фармаванне асобы і выклікі часу».Каложскія чытанні з'яўляюцца рэгіянальным этапам Міжнародных Калядных адукацыйных чытанняў і ўключаны ў Праграму супрацоўніцтва Міністэрства адукацыі Рэспублікі Беларусь і Беларускай Праваслаўнай Царквы на 2020-2025 гады.
Удзельнікамі мерапрыемства стануць святары, педагогі ўстаноў агульнай сярэдняй адукацыі, навучэнцы X–XI класаў устаноў агульнай сярэдняй адукацыі, навучэнцы ўстаноў сярэдняй спецыяльнай адукацыі, выкладчыкі і студэнты ўстаноў вышэйшай адукацыі.
Праграма мерапрыемства плануецца насычанай. 11 снежня пройдзе панэльная дыскусія, у межах якой удзельнікі абмяркуюць маральныя каштоўнасці і іх трансфармацыю і прымяненне штучнага інтэлекту ў адукацыі. Таксама ў першы дзень пройдуць дыялогавыя анлайн-пляцоўкі «Асвета і маральныя каштоўнасці» і «Выклікі часу і праблема захавання маральнасці сярод моладзі ў ХХІ стагоддзі».
12 снежня пройдуць пасяджэнні секцый, у рамках якіх удзельнікі абмяркуюць гісторыю асветы і адукацыі на беларускіх землях; выдавецкую дзейнасць Францыска Скарыны; духоўны подзвіг, асветніцкае служэнне і культурная спадчына беларускіх святых; гісторыю кнігі і кніжную культуру на беларускіх землях; іканапіс у кантэксце царкоўнага мастацтва; духоўныя каштоўнасці і маральны выбар у творах старажытнарускай літаратуры; выклікі часу ў творах літаратуры і мастацтва; маральную культуру народа ў люстэрку мовы і маральныя пошукі рускіх пісьменнікаў.