24 лютага на факультэце гісторыі, камунікацыі і турызму ў рамках мерапрыемстваў, прымеркаваных да 86-й гадавіны з Дня заснавання Купалаўскага ўніверсітэта, прайшло адкрыццё выставы «Купалаўскі ўніверсітэт: вехі гісторыі. 1940–1945 гг.».Аўтарам выставы з'яўляецца Юлія Кейка, старшы выкладчык кафедры турызму і культурнай спадчыны. Дызайн выканала начальнік Вучэбна-навукова-вытворчага аб'яднання «Студэнцкі медыяцэнтр» Анастасія Паўлава.
Экспазіцыя ахоплівае асноўныя этапы станаўлення і развіцця вышэйшай педагагічнай адукацыі ў Гродне ў перыяд з 1940 да 1945 года. Наведвальнікі выставы змогуць даведацца пра першых студэнтаў і выкладчыкаў Гродзенскага настаўніцкага інстытута, а таксама пазнаёміцца з перыядам аднаўлення работы Гродзенскага педагагічнага інстытута. Асаблівую каштоўнасць выстаўцы надаюць рэдкія архіўныя матэрыялы, прадастаўленыя Нацыянальным архівам Рэспублікі Беларусь, Беларускім дзяржаўным архівам кінафотафонадакументаў, Прэзідэнцкай бібліятэкай Рэспублікі Беларусь, а таксама асабістымі архівамі выпускнікоў 1948 года.
Выстава арганізавана на базе корпуса факультэта гісторыі, камунікацыі і турызму па адрасе: вул. Кастрычніцкая, 5.
