На факультэце гісторыі, камунікацыі і турызму праграма Дня адчыненых дзвярэй пачалася з прэс-канферэнцыі, на якой адміністрацыя і загадчыкі кафедраў расказалі прысутным пра асаблівасці навучання на факультэце. Потым выступіў намеснік дэкана Андрэй Гецэвіч. Ён падзяліўся з гасцямі з навуковымі і творчымі магчымасцямі факультэта, дзе студэнты змогуць рэалізаваць сябе.

Потым будучых студэнтаў чакалі тэматычныя пляцоўкі спецыяльнасцей. Выкладчыкі і студэнты расказалі школьнікам і іх бацькам аб спецыфіцы кожнай спецыяльнасці і дысцыплінах, якія будучыя студэнты вывучаць за час навучання.

Кульмінацыяй Дня адчыненых дзвярэй на факультэце гісторыі, камунікацыі і турызму стала экскурсія па Гродне, якую арганізавалі для абітурыентаў студэнты спецыяльнасці «Турызм і гасціннасць».

Дзень адчыненых дзвярэй на ваенным факультэце пачаўся з выступлення прадстаўнікоў кіраўніцтва факультэта і курсантаў, якія расказалі аб асаблівасцях навучання і службе, а таксама падзяліліся вынікамі прыёмнай кампаніі ў 2025 годзе.

Пасля размовы з адміністрацыяй факультэта госці змаглі наведаць тэматычныя пляцоўкі, на якіх больш падрабязна даведаліся пра спецыяльнасці і асаблівасці навучання на іх. Таксама жадаючыя змаглі праверыць сваю трапнасць у стральбе і адчуць сябе сапраўднымі пілотамі, апрабаваўшы трэніровачны сімулятар.

Завяршэннем мерапрыемства стала дэгустацыя ваеннай кашы, прыгатаванай курсантамі вайсковага факультэта.

Знаёмства з Купалаўскім універсітэтам на гэтым не заканчваецца. У суботу, 21 сакавіка, будучых студэнтаў і іх бацькоў чакае Адзіны дзень адчыненых дзвярэй «Кірмаш мэтавай падрыхтоўкі», на якім яны змогуць даведацца яшчэ больш інфармацыі аб усіх спецыяльнасцях ВНУ, атрымаць кансультацыю па правілах паступлення і пагутарыць з заказчыкамі кадраў.