Практыка для студэнтаў 2 курса спецыяльнасці «Гісторыя» факультэта гісторыі, камунікацыі і турызму ГрДУ імя Янкі Купалы ператварылася ў сапраўдную даследчую прыгоду, якая аб'яднала тэорыю, палявую рамантыку і жывую сувязь часоў. З 29 чэрвеня па 11 ліпеня інтэрнацыянальная каманда студэнтаў, у склад якой увайшлі юнакі і дзяўчаты з Рэспублікі Беларусь і Рэспублікі Туркменістан, прайшла археолага-этнаграфічную практыку. Маршрут будучых гісторыкаў падзяліўся на два захапляльныя блокі, у рамках якіх яны пагрузіліся ў вывучэнне спадчыны горада Гродна, а таксама традыцый і рамёстваў беларусаў. Студэнты дэталёва вывучылі ключавыя помнікі архітэктуры абласнога цэнтру. Яны наведалі Вялікую харальную сінагогу і сядзібу «Панямунь» – летнюю рэзідэнцыю апошняга караля Рэчы Паспалітай Станіслава Аўгуста Панятоўскага. Адмысловае захапленне ў рабят выклікала этнаграфічная частка практыкі. На базе Гродзенскага абласнога метадычнага цэнтра народнай творчасці студэнты не проста сутыкнуліся з гісторыяй, а літаральна стваралі яе сваімі рукамі на майстар-класе па народным ткацтве пад кіраўніцтвам вядомага майстра Алены Шунейкі. Паралельна студэнты першага курса спецыяльнасці «Гісторыя» на працягу двух тыдняў праводзілі археалагічныя даследаванні ў маляўнічым міжрэччы Котры і Дзітвы. Падрабязней пра палявыя будні, раскопкі і дзіўныя знаходкі студэнтаў-археолагаў можна прачытаць у нашым матэрыяле па спасылцы.

Лета для студэнтаў кафедры журналістыкі Гродзенскага дзяржаўнага ўніверсітэта імя Янкі Купалы стала па-сапраўднаму гарачай парой прафесійнага росту. Будучыя журналісты і піяршчыкі выйшлі далёка за межы студэнцкіх аўдыторый, каб даказаць свой прафесіяналізм на галоўных інфармацыйных пляцоўках краіны. Будзь то газетная паласа, тэлеаб'ектыў, digital-прастора ці відэа Reels – купалаўцы паспяхова асвоілі ўсе грані медыясферы.

Летняя практыка студэнтаў спецыяльнасцяў «Журналістыка» і «Інфармацыя і камунікацыя» разгарнулася адразу ў некалькіх лакацыях. У Цэнтры па сувязях з грамадскасцю ГрДУ імя Янкі Купалы будучыя спецыялісты забяспечвалі інфармацыйную падтрымку прыёмнай кампаніі, працуючы над стварэннем тэкстаў і яскравага візуальнага кантэнту. Рэспубліканскі эфір студэнты пакарылі на тэлеканале «РТР-Беларусь», дзе ў самым сэрцы сталіцы рыхтавалі аналітычныя сюжэты і запісвалі сінхроны для папулярнай праграмы «Акцэнты». У той жа час у Цэнтры культуры «Віцебск» рабяты знаходзіліся ў эпіцэнтры культурнага жыцця, прымаючы актыўны ўдзел у асвятленні маштабных мерапрыемстваў, уключаючы знакаміты «Славянскі базар». Выдатнай практычнай школай традыцыйна стала і галоўная газета вобласці «Гродзенская праўда», у рэдакцыі якой студэнты знутры вывучалі вёрстку друкаваных палос і развівалі сацыяльныя сеткі. Не менш насычаныя будні праходзілі на базе ТРК «Гродна Плюс», дзе будучыя майстры экрана працавалі тэлеаператарамі, здымаючы выпускі навін і забяспечваючы прамыя трансляцыі маштабных гарадскіх свят.

Студэнты-сацыёлагі ў рамках летняй практыкі з 29 чэрвеня па 11 ліпеня зрабілі важны крок насустрач будучай кар'еры. Галоўнай базай для іх апускання ў прафесію стаў Цэнтр аператыўных даследаванняў Інстытута сацыялогіі НАН Беларусі. Будучыя спецыялісты дэталёва асвоілі курс па накіраванню «Праграмаванне сацыялагічнага даследавання». Важнай часткай арганізацыйных мерапрыемстваў стала сустрэча з дырэктарам Інстытута сацыялогіі Мікалаем Мысліўцам. Мікалай Лявонцьевіч пазнаёміў хлопчыкаў і дзяўчынак з багатай гісторыяй установы, структурай Акадэміі навук і падрабязна расказаў пра перспектывы самарэалізацыі ў акадэмічным асяроддзі. Перад купалаўцамі таксама выступіла старшыня Савета маладых вучоных Крысціна Нэйман, якая прэзентавала ключавыя напрамкі работы і галоўныя дасягненні маладых даследчыкаў інстытута. Праведзеная практыка дазволіла рабятам атрымаць каштоўны досвед удзелу ў рэальных праектах, замацаваць лекцыйныя веды і сфарміраваць новыя прафесійныя кампетэнцыі для паспяховага старту.

Летняя практыка прадэманстравала гатоўнасць студэнтаў факультэта гісторыі, камунікацыі і турызму ГрДУ імя Янкі Купалы да вырашэння сур'ёзных прафесійных задач. Працуючы ў архівах і на археалагічных раскопках, у тэлевізійных студыях, рэдакцыях газет і навуковых арганізацыях, рабяты праявілі адказнасць, гнуткасць і шчырую цікавасць да сваёй справы.