Для ўдзельнікаў летняй школы падрыхтавана насычаная праграма. Штодзень праводзяць конкурсы, віктарыны і экскурсіі.

Так, учора, 8 ліпеня, школьнікі ўдзельнічалі ў конкурсе на веданне рускай мовы «Самы разумны», акунуліся ў свет законаў і юрыспрудэнцыі падчас віктарыны «Падарожжа ў краіну права», паспаборнічалі ў спартовай гульні «Мяч у мэту – як веды ў галаву!». Будучых інжынераў пазнаёмілі з факультэтам біялогіі і экалогіі і спецыяльнасцю «Вытворчасць прадукцыі і арганізацыя грамадскага харчавання». Для школьнікаў педагагічнай скіраванасці была праведзена інтэлектуальная гульня «Мы – будучыя педагогі!».

Сёння, 9 ліпеня, хлопцы праверылі свае веды па фізіцы, прыняўшы ўдзел у конкурсе «Самы разумны». Навучэнцаў інжынернай накіраванасці пазнаёмілі з інжынерным факультэтам, спецыяльнасцямі і кафедрамі, а таксама арганізавалі для іх тэматычную сустрэчу «Я інжынер свайго лёсу». Будучыя педагогі пазнаёміліся з факультэтам псіхалогіі Купалаўскага ўніверсітэта, дзе для іх правялі семінар-трэнінг «Я і мой характар». Акрамя таго, для рабят правялі экскурсію «Каложская царква – жывая гісторыя пад адкрытым небам» і арганізавалі паход у кіно.

Сканчаюць свой насычаны дзень рабяты падрыхтоўкай насценгазеты, якую яны прадставяць у канцы шматпрофільнай летняй школы «Купалаўскі старт».