У рамках мерапрыемства ўдзельнікі пазнаёміліся з сучаснымі тэхналогіямі і трэндамі ад экспертаў, даведаліся больш пра прафесію рэстаратара і атрымалі магчымасць задаць пытанні прадстаўнікам універсітэта і прадпрыемства.

Загадчык кафедры тэхналогіі, фізіялогіі і гігіены харчавання Аксана Паўлава падрабязна расказала пра спецыяльнасці, якія прапануе ГрДУ імя Янкі Купалы, і спецыфіку прафесіі рэстаратара.

Выпускніца Купалаўскага ўніверсітэта і супрацоўнік «АзотСэрвіс» Наталля Максімчык падзялілася асабістым досведам працы на прадпрыемстве. Распавяла пра навучанне і пачатак прафесійнага шляху.

Дырэктар "АзотСэрвіс" Павел Лісоўскі ў сваёй прамове падкрэсліў запатрабаванасць прафесіі і адзначыў, што атрыманыя веды і навыкі спатрэбяцца не толькі ў прафесійнай дзейнасці, але і ў асабістым жыцці. Таксама Павел Мікалаевіч расказаў аб магчымасцях атрымання мэтавага накіравання для паступлення і магчымасці праходжання аплатнай практыкі на прадпрыемстве ў рамках супрацоўніцтва з універсітэтам.

Удзельнікам мерапрыемства прапанавалі паўдзельнічаць у фудквізе і інтэрактыўнай гульні «Харчовы кракадзіл». Завяршылася сустрэча дэгустацыяй прадукцыі прадпрыемства і ўзнагароджваннем самых актыўных.

Сустрэча стала важным крокам у развіцці супрацоўніцтва паміж Купалаўскім універсітэтам і сэрвісным унітарным прадпрыемствам "АзотСэрвіс" у падрыхтоўцы кваліфікаваных кадраў для сферы грамадскага харчавання.