Прафілактычная акцыя «Дзеці: увага!» да канца года пройдзе ва ўсіх дзіцячых садках Кастрычніцкага раёна Гродна.
Акцыя стартавала 2 снежня і будзе доўжыцца да 19 снежня 2019 года. Яе ініцыятарамі і арганізатарамі выступаюць студэнты-купалаўцы, якія ўваходзяць у добраахвотную студэнцкую дружыну юрыдычнага факультэта, пры садзейнічанні УДАІ УУС Гродзенскага аблвыканкама і адміністрацыі Кастрычніцкага раёна горада Гродна.
Студэнты-дружыннікі разам з выхаванцамі дзіцячых садкоў у гульнявой форме вывучаюць асноўныя правілы дарожнага руху: распавядаюць малышам аб тым, як правільна пераходзіць вуліцу, што абазначаюць розныя сігналы святлафора і дарожныя знакі. У канцы тэатралізаванага прадстаўлення дзяцей чакае невялікі гульнявы тэст па засвоеных ведах.
Па словах кіраўніка добраахвотнай студэнцкай дружыны юрыдычнага факультэта Купалаўскага ўніверсітэта, старшага выкладчыка кафедры міжнароднага права Алены Каранёвай, інтэрактыўныя заняткі на тэму правілаў дарожнага руху ахопліваюць каля 40 устаноў дашкольнай адукацыі Кастрычніцкага раёна. Творчыя групы студэнтаў выступаюць на іх у якасці вядучых.
Дарэчы, такая акцыя ўжо праводзілася купалаўцамі ў красавіку гэтага года - у ёй прымалі ўдзел выхаванцы дзіцячых садкоў Ленінскага раёна Гродна.
Гродзенскі дзяржаўны ўніверсітэт імя Янкі Купалы