Па выніках пяці дзён працы прыёмнай кампаніі для атрымання паглыбленай вышэйшай адукацыі ў ГрДУ імя Янкі Купалы пададзена 28 заяў.
Працягнуць навучанне па адукацыйных праграмах магістратуры Купалаўскага ўніверсітэта ў 2026 годзе можна па 7 спецыяльнасцях. План набору складае 45 месцаў: 18 месцаў па дзённай форме атрымання адукацыі, 27 – па завочнай. 9 абітурыентаў маюць навуковыя публікацыі (агульная колькасць публікацый - 52). 3 абітурыенты скончылі ўстановы вышэйшай адукацыі з дыпломам з адзнакай.
Сярод тых, хто абраў атрыманне паглыбленай вышэйшай адукацыі ў Купалаўскім універсітэце Дзмітрый Захарчук, член Пастаяннай камісіі Савета Рэспублікі Нацыянальнага сходу Рэспублікі Беларусь па рэгіянальнай палітыцы і мясцовым самакіраванні, старшыня Ваўкавыскага раённага выканаўчага камітэта.
– Планую вывучаць у далейшым эканоміку, таму што гэта непасрэдна звязана з маёй працай, па-першае. Эканоміка заўсёды стаіць на чале кута развіцця любога прадпрыемства, рэгіёна, вобласці і краіны ў цэлым. Падаў дакументы на спецыяльнасць «Менеджмент». Чаму менавіта Купалаўскі ўніверсітэт? Таму што гэта лепшая ВНУ краіны. І на гэтым кропка, – падкрэсліў Дзмітрый Іванавіч.
У гутарцы з прэс-службай універсітэта Дзмітрый Захарчук адзначыў, што не варта спыняцца ў атрыманні адукацыі.
– Тэндэнцыі мяняюцца, адукацыйныя працэсы і падыходы развіваюцца. Любы які паважае сябе спецыяліст і кіраўнік усё жыццё прысвячае адукацыі, таму што мяжы дасканаласці няма, – сказаў на заканчэнне кіраўнік Ваўкавыскага раёна.
Нагадаем, што ў ГрДУ імя Янкі Купалы арганізавана электронная чарга на сайце abit.by у раздзеле «Магістратура». З яе дапамогай кожны абітурыент можа выбраць зручны час для асабістага візіту і падачы дакументаў у прыёмную камісію ўніверсітэта. Прыём дакументаў ад выпускнікоў Купалаўскага ўніверсітэта гэтага года праходзіць па адрасе Леніна, 32. Уступныя іспыты для абітурыентаў, якія паступаюць для атрымання паглыбленай вышэйшай адукацыі, пройдуць у адпаведнасці з зацверджаным раскладам 9 ліпеня. Кансультацыя ў вочнай форме пройдзе 8 ліпеня, з відэакансультацыяй можна азнаёміцца на сайце abit.by.
Залічэнне ў лік студэнтаў дзённай і завочнай форм атрымання паглыбленай вышэйшай адукацыі за кошт сродкаў рэспубліканскага бюджэту пройдзе 14 ліпеня, на платнай аснове – 16 ліпеня. З умовамі і парадкам прыёму, пералікам спецыяльнасцей, форм і тэрмінаў навучання, спісам неабходных дакументаў, праграмамі ўступных іспытаў і іншай карыснай інфармацыяй можна азнаёміцца на сайце abit.by, раздзел «Магістратура».
Гродзенскі дзяржаўны ўніверсітэт імя Янкі Купалы