Лета ў самым разгары, але для 131 купалаўца гэта не проста час адпачынку, а магчымасць набыць новыя навыкі, завесці знаёмствы і змяніць наш універсітэт сваімі рукамі. Сёлета ў ГрДУ імя Янкі Купалы сфарміравана 13 будаўнічых атрадаў: восем з іх зараз актыўна працуюць, яшчэ адзін - на падыходзе. Рабяты абнаўляюць аўдыторыі ў навучальных карпусах і з асаблівым трапятаннем прыводзяць у парадак калідоры і пакоі інтэрнатаў - зусім хутка яны сустрэнуць сваіх жыхароў. Як уладкаваны працоўны рытм у атрадах і што адчуваюць тыя, хто стварае камфорт для сваіх аднакурснікаў?
Немагчыма ўявіць сабе студэнцкі атрад без актыўнай працоўнай дзейнасці! Чым жа займаюцца на сваіх аб'ектах юнакі і дзяўчаты? Пра насычаныя будні нам расказала Ксенія Пачынчык, студэнтка 4 курса педагагічнага факультэта:
- Уражанне добрае! Працуем, стараемся і, вядома, паляпшаем інтэрнат. За гэтыя тыдні мы паспелі прагрунтаваць столі і сцены, заняцца абнаўленнем лавачак на вуліцы. Цяпер фарбуем сцены і столі на кухні і ў пакоях, змяняем плінтус. Таксама мы будзем абнаўляць дзіцячую пляцоўку, якая знаходзіцца на тэрыторыі інтэрната.
Для Ксеніі статус "камандзіра атрада" прадугледжвае не толькі валоданне малярнай прыладай, але і развіццё арганізатарскіх якасцяў:
- Я прыйшла ў студатрад, каб атрымаць новы вопыт. Да гэтага я працавала толькі з дзецьмі. Вырашыла, што ў жыцці ўсё спатрэбіцца. Як камандзір, я адказваю за збор рабят, размеркаванне задач, аператыўнае вырашэнне пытанняў і, безумоўна, кантралюю, каб усе паспелі паабедаць.
Для многіх рабят гэтае лета стала першым сур'ёзным працоўным вопытам. Апроч новых уражанняў яны таксама набываюць каштоўныя навыкі. У гэтым пераканалася і Паліна Чабурэева, студэнтка 3 курса інжынернага факультэта:
- Прыйшоўшы сюды ўпершыню, я навучылася грунтаваць сцены, фарбаваць, працаваць з валікам і пэндзлікам. Але самае галоўнае - гэта калектыў. Ён у нас дастаткова дружны і вясёлы, так што сумаваць некалі. Я радая, што змагла зблізіцца з рабятамі, з якімі мы вучымся на адным патоку, а таксама набыць новыя знаёмствы.
Для Ульяны Гаўрык, студэнткі 4 курса інжынернага факультэта, гэтае лета таксама стала першым у складзе студэнцкага будаўнічага атрада. Для дзяўчыны праца тут - не толькі спосаб з карысцю правесці канікулы, але і магчымасць прайсці практыку:
- У нашу каманду ўвайшлі выдатныя рабяты, якія адказна падыходзяць да справы. Таксама ў нас дастойная матэрыяльная база. Ужо ў першы дзень нас падрабязна праінфармавалі, правялі інструктаж і растлумачылі ўсё, што датычыцца нашай дзейнасці: яе аб'ём і спецыфіку. Таму праблем не ўзнікла. Як камандзіру, мне важна правільна размеркаваць абавязкі. За тры тыдні я паспела добра вывучыць здольнасці кожнага байца, і зараз, калі я ведаю, хто з чым спраўляецца лепш, праца ідзе значна хутчэй і зладжаней.
Існуе стэрэатып, што ў будаўнічых атрадах знаходзіцца месца толькі для юнакоў. Аднак удзельніцы студэнцкага руху ГрДУ імя Янкі Купалы паспяхова даказваюць адваротнае: дзяўчаты не толькі працуюць нароўні з усімі, але і ўпэўнена кіруюць калектывамі.
- На самой справе задачы ў нас даволі разнастайныя. Паколькі наш атрад складаецца толькі з дзяўчын, нам часцей даручаюць працу, злучаную з добраўпарадкаваннем тэрыторыі ці пераносам небуйных прадметаў, напрыклад, рэштак старой мэблі ці фанеры. Але бываюць і чыста тэхнічныя заданні: сёння вось прыкручвалі дзверцы да шафак, – падзялілася досведам Вераніка Вашкелевіч, студэнтка 4 курса інжынернага факультэта.
Упэўненыя, праз гады студэнты з усмешкай успомняць гэтае лета ў студэнцкім будаўнічым атрадзе. Лета, якое падарыла не толькі новыя навыкі, але і сапраўдных сяброў, незабыўныя эмоцыі і гонар за справу, зробленую сваімі рукамі.
Гродзенскі дзяржаўны ўніверсітэт імя Янкі Купалы