21 жніўня ў абласной філармоніі горада Гродна прайшла традыцыйная жнівеньская канферэнцыя педагогаў, прысвечаная пачатку новага навучальнага года. У лік яе ўдзельнікаў увайшла дэлегацыя Гродзенскага дзяржаўнага ўніверсітэта імя Янкі Купалы.
На канферэнцыю былі запрошаны кіруючыя работнікі і педагогі сістэмы адукацыі Гродзенскай вобласці. У іх лік увайшлі і прадстаўнікі Купалаўскага ўніверсітэта: прарэктар па ідэалагічнай і выхаваўчай рабоце Васіль Сянько, дырэктар Лідскага каледжа Андрэй Сямашка, дырэктар Тэхналагічнага каледжа Андрэй Буць, дырэктар Гуманітарнага каледжа Наталля Валковіч, начальнік Цэнтра даўніверсітэцкай адукацыі Алена Лапкоўская, намеснік дэкана педагагічнага факультэта Алена Джух, намеснік дырэктара Ваўкавыскага каледжа Марына Наваян і намеснік дырэктара Гуманітарнага каледжа Юлія Булутава.
У канферэнцыі прынялі ўдзел міністр адукацыі Рэспублікі Беларусь Андрэй Іванец, старшыня Гродзенскага аблвыканкама Юрый Караеў, старшыня Гродзенскага абласнога Савета дэпутатаў Алена Пасюта, а таксама начальнік галоўнага ўпраўлення адукацыі Гродзенскага аблвыканкама Руслан Абрамчык. Ганаровым госцем сустрэчы выступіў Народны настаўнік Рэспублікі Беларусь Альфрэд Ладыка.
Галоўнай тэмай сустрэчы стала абмеркаванне стратэгіі ўдасканалення сістэмы адукацыі Гродзеншчыны і гатоўнасць устаноў адукацыі да новага навучальнага года.
Андрэй Іванец адзначыў, што нязменным прыярытэтам у навучальным годзе застаецца даступнасць і якасць адукацыі на ўсіх яе ўзроўнях: ад дашкольнай да вышэйшай. Адмысловая ўвага будзе нададзена інклюзіўнай адукацыі і практыка-арыентаванасці ў каледжах. Асаблівы акцэнт будзе зроблены на грамадзянскім і патрыятычным выхаванні.
– Гэтую работу мы павінны праводзіць, пачынаючы з дзіцячага сада, са школьнай лавы, у каледжах і ВНУ, таму што ад таго, якая будзе наша моладзь, залежыць тое, якая будзе наша краіна, – адзначыў Андрэй Іванец.
Асаблівасцямі ў сістэме адукацыі Гродзеншчыны падзяліўся Руслан Абрамчык. Ён адзначыў, што ў гэтым годзе з'явяцца новаўвядзенні ў рамках ваенна-патрыятычнага выхавання – у школах у рамках прадмета "Дапрызыўная падрыхтоўка" з'явіцца раздзел аб беспілотных тэхналогіях, а навучэнцаў каледжаў чакаюць ваенна-палявыя зборы, якія раней былі арганізаваны для дзесяцікласнікаў. Таксама ў кожным каледжы будзе працаваць ваенна-патрыятычны клуб.
Асаблівы акцэнт у наступным навучальным годзе будзе зроблены на больш актыўным супрацоўніцтве з заказчыкамі кадраў.
– Прапрацоўваецца пытанне аб стварэнні ў Гродзенскай вобласці цэнтра аўтаматызаваных, рабатызаваных тэхналогій, для таго каб на пяць гадоў наперад быць гатовымі выпускаць спецыялістаў для нашай прамысловасці, – падзяліўся Руслан Абрамчык.
Гаворачы аб дашкольнай адукацыі, начальнік галоўнага ўпраўлення адукацыі Гродзенскага аблвыканкама адзначыў, што будзе павялічвацца колькасць ясельных груп. На асаблівым кантролі будзе графік работы ўстаноў дашкольнай адукацыі.
Таксама ў рамках канферэнцыі было адзначана, што сістэма адукацыі Гродзенскай вобласці прызнана лепшай у рэспубліцы па выніках работы за 2025 год, што з'яўляецца заслугай кожнага педагога, кіраўніка і настаўніка.
Гродзенскі дзяржаўны ўніверсітэт імя Янкі Купалы