Дыскусійнае мерапрыемства з удзелам Алега Раманава, старшыні РГА «Белая Русь», старшыні партыі «Белая Русь», намесніка старшыні Пастаяннай камісіі па правах чалавека, нацыянальных адносінах і СМІ Палаты прадстаўнікоў Нацыянальнага сходу Рэспублікі Беларусь 8-га склікання, доктара філасофскіх навук, прафесара, рэдактара новага навучальнага дапаможніка, прайшло 27 лістапада.
Купалаўскі ўніверсітэт стаў пляцоўкай для публічнага абмеркавання вузаўскага падручніка па дысцыпліне «Філасофія», падрыхтаванага калектывам аўтараў гродзенскіх універсітэтаў для нефіласофскіх спецыяльнасцяў. Абмеркаванне прайшло ў фармаце адкрытага дыялогу.
Галоўная мэта – даведацца пра меркаванне экспертнай супольнасці і выкладчыкаў універсітэтаў, дзе будзе выкладацца дысцыпліна «Філасофія» з выкарыстаннем новага навучальнага дапаможніка, пачуць водгукі пра яго метадычны і змястоўны складнік.
Удзельнікамі сустрэчы сталі прадстаўнікі рэктарата, дэканы факультэтаў і кіраўнікі структурных падраздзяленняў ГрДУ імя Янкі Купалы, аўтары-ўкладальнікі і рэдактары выдання, прадстаўнікі выкладчыцкага складу ўстаноў вышэйшай адукацыі Гродзенскай вобласці, якія ажыццяўляюць адукацыйны працэс па вучэбнай дысцыпліне «Філасофія», а таксама зацікаўленыя студэнты. Мадэратарам мерапрыемства выступіў кандыдат філасофскіх навук, дацэнт Віктар Карпінскі.
Прысутных вітала рэктар універсітэта, доктар гістарычных навук Ірына Кітурка. Яна павіншавала калектыў аўтараў з выхадам новага выдання, падзякавала за ўклад у развіццё філасофскай навукі і адзначыла высокі ўзровень падрыхтоўкі студэнтаў Купалаўскага ўніверсітэта ў галіне філасофскіх дысцыплін.
– Сёння кафедра філасофіі – гонар Гродзенскага дзяржаўнага ўніверсітэта імя Янкі Купалы. Не маючы філасофскай спецыяльнасці ва ўніверсітэце як такой, падрыхтоўка кадраў вышэйшай навуковай кваліфікацыі па гэтай дысцыпліне вядзецца настолькі граматна, што студэнты выбіраюць філасофію ў якасці асноўнага навуковага напрамку і паспяхова абараняюць кандыдацкія і доктарскія дысертацыі, ствараюць актуальныя, цікавыя і даступныя па зместу падручнікі, якія карыстаюцца попытам у ВНУ краіны. Падручнік, які сёння прэзентуецца, атрымаў высокую ацэнку з боку зацікаўленых прадстаўнікоў міністэрстваў і ведамстваў Рэспублікі Беларусь, – адзначыла Ірына Кітурка.
Пра канцэпцыю навучальнага выдання расказаў арганізатар аўтарскага калектыву, рэдактар навучальнага выдання, прафесар кафедры філасофіі, доктар філасофскіх навук, прафесар, заслужаны дзеяч навукі Рэспублікі Беларусь Чэслаў Кірвель.
Метадычную аснову і змест падручніка па дысцыпліне «Філасофія» прадставіў рэдактар вучэбнага выдання – старшыня РГА «Белая Русь», старшыня партыі «Белая Русь», намеснік старшыні Пастаяннай камісіі па правах чалавека, нацыянальных адносінах і СМІ Палаты прадстаўнікоў Нацыянальнага сходу Рэспублікі Беларусь 8-га склікання, доктар філасофскіх навук, прафесар Алег Раманаў. Ён падкрэсліў, што вывучэнню філасофіі ў сучаснай сістэме вышэйшай адукацыі Беларусі надаецца вялікае значэнне:
– Прэзідэнт Рэспублікі Беларусь Аляксандр Лукашэнка вельмі ўважліва ставіцца да працэсаў, якія адбываюцца ў сістэме адукацыі краіны, у тым ліку ў сферы сацыяльна-гуманітарнага блока. Па яго ініцыятыве быў распрацаваны падручнік па дысцыпліне «Гісторыя беларускай дзяржаўнасці», а таксама новы падручнік па дысцыпліне «Філасофія». Прыемна, што новы падручнік па філасофіі атрымаў высокую ацэнку з боку Кіраўніка дзяржавы.
Меркаваннем аб вучэбным выданні з боку акадэмічнай супольнасці падзяліліся загадчык кафедры гуманітарных навук Гродзенскага дзяржаўнага аграрнага ўніверсітэта Пётр Стэцкевіч, дацэнт кафедры адукацыйных тэхналогій Гродзенскага абласнога інстытута развіцця адукацыі, кандыдат гістарычных навук, дацэнт Мікалай Еўдакіменка, а таксама выконваючы абавязкі загадчыка кафедры філасофіі, кандыдат філасофскіх навук Аляксандра Дубравіна.
Адзначым, што ў новым навучальным дапаможніку змяшчаецца поўны курс філасофіі, структураваны ў адпаведнасці з патрабаваннямі тыпавой вучэбнай праграмы па вучэбнай дысцыпліне «Філасофія» для ўстаноў вышэйшай адукацыі. Прыводзіцца інфармацыя аб такіх вядучых раздзелах філасофскіх ведаў, як анталогія, гнасеалогія, філасофская антрапалогія, сацыяльная філасофія і філасофія гісторыі. Разглядаюцца найноўшыя дасягненні сусветнай філасофіі. Аўтары звяртаюць увагу на трансфармацыю праблем сучаснай філасофскай думкі ў сферы геапалітыкі, культуры і навукі першай чвэрці ХХІ стагоддзя.
Навучальны дапаможнік адрасуецца студэнтам вышэйшых навучальных устаноў, магістрантам, аспірантам, выкладчыкам вышэйшай школы і ўсім, хто цікавіцца актуальнымі праблемамі філасофіі.
Гродзенскі дзяржаўны ўніверсітэт імя Янкі Купалы