Фестываль педагагічных класаў з 2018 года штогод праводзіцца педагагічным факультэтам пры падтрымцы галоўнага ўпраўлення адукацыі Гродзенскага абласнога выканаўчага камітэта ў мэтах папулярызацыі педагагічнай прафесіі сярод моладзі, выяўлення і развіцця творчых здольнасцей вучняў.
У VII Фестывалі прынялі ўдзел 50 каманд са школ Гродзенскай вобласці, якія прадставілі работы на конкурс відэапрэзентацый "Мы - будучыя педагогі", конкурс фатаграфій па матывах мастацкіх твораў "Вобраз педагога ў мастацтве" і конкурс "Лепшы міні-ўрок". Таксама члены каманд прайшлі індывідуальнае тэсціраванне па праграме факультатыва "Уводзіны ў педагагічную прафесію".
1 сакавіка адбылося заключнае мерапрыемства VII Фестывалю педагагічных класаў. Удзельнікі наведалі віртуальную экскурсію па Гродзенскім дзяржаўным універсітэце імя Янкі Купалы, пазнаёміліся са спецыяльнасцямі ўніверсітэта на пляцоўках 9 факультэтаў: педагагічнага, матэматыкі і інфарматыкі, гісторыі, камунікацыі і турызму, фізіка-тэхнічнага, філалагічнага, псіхалогіі, біялогіі і экалогіі, мастацтваў і дызайну, фізкультуры.
20 каманд-фіналістаў прадэманстравалі яркія творчыя нумары на сцэне Купалаўскага ўніверсітэта.
З прывітальным словам да ўдзельнікаў мерапрыемства звярнуліся рэктар Гродзенскага дзяржаўнага ўніверсітэта імя Янкі Купалы, доктар гістарычных навук Ірына Кітурка, начальнік галоўнага ўпраўлення адукацыі Гродзенскага абласнога выканаўчага камітэта Руслан Абрамчык і старшыня Гродзенскай абласной арганізацыі Беларускага прафесійнага саюза работнікаў адукацыі і навукі Лела Шпак.
Усім камандам былі ўручаны сертыфікаты, дыпломы і памятныя падарункі. З пералікам каманд-фіналістаў можна азнаёміцца ТУТ.
Гродзенскі дзяржаўны ўніверсітэт імя Янкі Купалы