18 снежня ў Гродзенскім дзяржаўным універсітэце імя Янкі Купалы прайшла па-сапраўднаму чароўная падзея – дабрачынны калядны канцэрт. Галоўная сцэна ўніверсітэта, дзякуючы студэнтам і выкладчыкам філалагічнага факультэта, ператварылася ў казачнае месца.
Праграма вечара была разнастайнай. Танцавальныя і вакальныя нумары былі напоўнены атмасферай Калядаў, гульня на саксафоне ўразіла гледачоў і пакінула незабыўныя ўражанні. Акрамя таго, студэнты і выкладчыкі філалагічнага факультэта ГрДУ імя Янкі Купалы парадавалі гледачоў яркімі, прадуманымі да дробязяў касцюмамі і дэкарацыямі, якія стварылі казачную атмасферу.
Удзельнікі канцэрту не проста падарылі цудоўны выступ, але і нагадалі пра галоўныя каштоўнасці – дабро і міласэрнасць. Традыцыйны калядны канцэрт арганізаваны з высакароднай мэтай. Усе сабраныя сродкі будуць накіраваны ў Гродзенскі абласны цэнтр медыцынскай рэабілітацыі дзяцей-інвалідаў і хворых дзяцей псіханеўралагічнага профілю.
Гродзенскі дзяржаўны ўніверсітэт імя Янкі Купалы