У Гродзенскім дзяржаўным універсітэце імя Янкі Купалы ў рамках Тыдня педагагічнага майстэрства адбыўся круглы стол удзельнікаў аўтарскага курсу доктара педагагічных навук Андрэя Караля «Методыка навучання праз адкрыццё: як навучаць ўсіх па-рознаму, але аднолькава» і студэнтаў педагагічных спецыяльнасцяў на тэму «Прафесійнае майстэрства сучаснага педагога: шлях да поспеху».
Падчас круглага стала ўдзельнікі абмеркавалі вынікі ўкаранення ў адукацыйную практыку тэхналогіі эўрыстычнага, або якое адкрывае, навучання, закранулі шырокае кола пытанняў, якія датычацца фарміравання прафесійнага майстэрства настаўніка, разгледзелі ўмовы, якія спрыяюць самавыяўленню, творчаму росту і паспяховасці сучаснага педагога.
Мадэратарамі круглага стала выступілі начальнік вучэбна-метадычнага ўпраўлення ГрДУ імя Янкі Купалы Марына Калацэй і загадчык лабараторыі адукацыйных інавацый Алег Каляга.
У пачатку працы круглага стала да прысутных звярнулася дацэнт кафедры педагогікі і сацыяльнай работы педагагічнага факультэта Таццяна Прудко. У сваім выступе яна адзначыла важнасць захавання і распаўсюджвання лепшых узораў педагагічнага майстэрства, пералічыла фактары паспяховасці сучаснага педагога.
– Праца ў класе або аўдыторыі патрабуе пастаяннай самааддачы, захопленасці, нястомных пошукаў і адкрыццяў, – падкрэсліла Таццяна Міхайлаўна. – Толькі так можна рэалізаваць сябе, узбагаціць сваіх вучняў, нацэліць іх на стваральную творчую дзейнасць.
Практычнымі вынікамі выкарыстання прыёмаў адкрываючага навучання ў працы са студэнтамі філалагічнага факультэта падзялілася ўдзельніца аргдзейнаснага курса «Методыка навучання праз адкрыццё: як навучаць ўсіх па-рознаму, але аднолькава», дацэнт кафедры беларускай філалогіі Нона Шандроха. Яна нагадала, што праца педагога патрабуе асаблівай культуры і ўменняў, а яго выніковасць мае выключную каштоўнасць. У пацверджанне сваіх думак Нона Эдмундаўна прывяла паэтычныя радкі: «Калі на свет нараджаецца настаўнік, на небе запальваецца зорка».
У выступе старэйшага выкладчыка кафедры рамана-германскай філалогіі Алены Джух прагучала думка, што ўніверсітэцкі выкладчык павінен мець унікальны прафесійны слых, каб разумець запыты сучаснай студэнцкай аўдыторыі. Алена Мікалаеўна расказала, што вопыт удзелу ў аргдзейнасным курсе дазволіў ёй пашырыць уяўленні пра асобу педагога, які імкнецца да творчай самарэалізацыі.
Сваімі ўяўленнямі аб прафесіі педагога падзялілася студэнтка 3 курса педагагічнага факультэта Дар'я Вайцяховіч. Дзяўчына адзначыла, што за час вучобы ў яе – будучага настаўніка пачатковых класаў - сфармавалася паданне пра важнасць пастаяннай унутранай рэфлексіі, здольнай сфармаваць адказнага і мэтанакіраванага педагога, які думае і аналізуе. Пра адкрыцці, якія здзяйсняліся на занятках па інфармацыйных тэхналогіях, распавяла ўдзельнікам круглага стала студэнтка 1 курса факультэта гісторыі, камунікацыі і турызму Дыяна Семянюк.
У ходзе дыскусіі былі разгледжаны асобныя аспекты закранутай праблематыкі. Вопытам выкарыстання адкрытых заданняў у прафарыентацыйнай рабоце з вучнямi ліцэя № 1 г. Гродна падзялілася начальнік Рэгіянальнага цэнтра тэсціравання і прафесійнай арыентацыі моладзі Аксана Валюк, аб асаблівай ролі і адказнасці педагога ў эпоху лічбавых тэхналогій нагадала дацэнт кафедры ўзроставай і педагагічнай псіхалогіі Ганна Янчый.
Складовай часткай круглага стала стала падвядзенне вынікаў і ўзнагароджанне пераможцаў конкурсу творчых прац «Стихооблако ценностей», арганізаванага на форуме электроннага навукова-метадычнага часопіса «Універсітэт адукацыйных інавацый». У конкурсе прынялі ўдзел 70 чалавек, свае працы прадставілі выкладчыкі і студэнты купалаўскага ўніверсітэта, настаўнікі і навучэнцы школ горада і вобласці. У тройку асноўных метапредметаў, якія былі абраныя канкурсантамі для напісання эсэ пра каштоўнасці сучаснага чалавека, увайшлі словы «жыццё», «імгненне» і «я».
– У конкурсу свой непаўторны рытм, у дні яго правядзення адчуваецца пульсацыя нестандартных думак, яркіх вобразаў, творчых ідэй. Гэта час тых, хто імкнецца да пазнання новага ў сабе і навакольным свеце, – падкрэсліў Алег Каляга, – Інавацыі ў навучанні здольныя стаць візітнай карткай універсітэта, у далейшым з іх дапамогай можна пашыраць кола людзей, гатовых здзяйсняць адкрыцці, прымаць самастойныя рашэнні і адказваць за іх, быць здольнымі дзейнічаць у нестандартных сітуацыях, а самае галоўнае - быць паспяховымі і здольнымі раскрыць свой творчы патэнцыял.
Гродзенскі дзяржаўны ўніверсітэт імя Янкі Купалы