Сёння, 19 сакавіка, у навуковай бібліятэцы ГрДУ імя Янкі Купалы панавала асаблівая атмасфера. Тут прайшла прэзентацыя выданняў, прысвечаных станаўленню хрысціянства на Гродзеншчыне і шматвяковым лёсу Каложскай (Барысаглебскай) царквы.
Мерапрыемства адкрыў дырэктар навуковай бібліятэкі ГрДУ імя Янкі Купалы Мікалай Грынько, а галоўным госцем і спікерам сустрэчы стаў настаяцель Барысаглебскай царквы, протаіерэй Аляксандр Балоннікаў.
Настаяцель прыхода храма святых пакутнікаў Барыса і Глеба на Каложы Аляксандр Балоннікаў прэзентаваў купалаўцам чатыры кнігі: «10 стагоддзяў гісторыі Каложы», «Каложская Адзігітрыя», «16 слоў пра Каложа», а таксама «Праваслаўныя храмы Гродна XII-XVI стст.».
Падчас прэзентацыі протаіерэй Аляксандр Балоннікаў высунуў і абгрунтаваў важны тэзіс: гісторыя Каложы – гэта не толькі наша нацыянальнае багацце, але і каштоўны матэрыял для маладых даследчыкаў. На прыкладзе прадстаўленых кніг было паказана, як цесна пераплецены вера, мастацтва і гісторыя нашага горада. Нагадаем, што Каложская (Барысаглебская) царква застаецца адзіным унікальным помнікам Гродзенскай архітэктурнай школы перыяду Старажытнай Русі, які захаваўся да нашых дзён.
Мінулая сустрэча дазволіла студэнтам, супрацоўнікам і выкладчыкам Гродзенскага дзяржаўнага ўніверсітэта імя Янкі Купалы па-новаму зірнуць на знаёмыя сцены старажытнага храма, які хавае ў сабе таямніцы цэлага пакалення.
Гродзенскі дзяржаўны ўніверсітэт імя Янкі Купалы