18 верасня ў Купалаўскім універсітэце прайшла сустрэча рэктара Ірыны Кітурка са старастамі навучальных груп. Гэтае мерапрыемства стала традыцыйным стартам новага навучальнага года, на якім абмяркоўваліся актуальныя пытанні і планы на найбліжэйшыя месяцы.
У мерапрыемстве прынялі ўдзел старасты навучальных груп, прадстаўнікі студэнцкага савета і выкладчыкі ўніверсітэта. Падчас сустрэчы рэктар Ірына Кітурка ўручыла граматы старастам, якія праявілі актыўнасць і ініцыятыву ў арганізацыі навучальнага працэсу і жыцця ўніверсітэта. Яна адзначыла, што старасты адыгрываюць ключавую ролю ў падтрыманні сувязі паміж студэнтамі і адміністрацыяй, а іх уклад у развіццё ўніверсітэцкага асяроддзя неацэнны.
Ірына Фёдараўна падкрэсліла, што актыўны ўдзел студэнтаў у жыцці ўніверсітэта спрыяе стварэнню больш камфортнай і прадуктыўнай абстаноўкі для навучання. Яна заклікала ўсіх старастаў працягваць развіваць свае лідарскія якасці і ўносіць свае ідэі ва ўдасканаленне навучальнага працэсу.
На сустрэчы ўзнімаліся пытанні паляпшэння ўмоў для студэнтаў, арганізацыі навучальнага працэсу і пашырэння магчымасцей для ўдзелу ў культурных, навуковых і спартыўных мерапрыемствах. Таксама абмяркоўваліся тэмы, звязаныя з актывізацыяй студэнцкага супраўлення.
Акрамя таго, рэктар адзначыла, што адміністрацыя ўніверсітэта актыўна працуе над паляпшэннем інфраструктуры і ўкараненнем сучасных тэхналогій для стварэння максімальна спрыяльных умоў для навучання і ўсебаковага развіцця студэнтаў.
Старасты, у сваю чаргу, прадставілі свае ідэі і прапановы па ўдасканаленні навучальнага працэсу і арганізацыі мерапрыемстваў, накіраваных на згуртаванне студэнцкага калектыву і падтрыманне дружалюбнай атмасферы ва ўніверсітэце. У канцы сустрэчы рэктар падзякавала старастам за іх актыўнасць і гатоўнасць працаваць на карысць універсітэцкай супольнасці.
Гродзенскі дзяржаўны ўніверсітэт імя Янкі Купалы