З 29 красавіка па 1 мая ў Мінску адбыўся Першы беларуска-ўзбекскі форум прафесійнай адукацыі. Галоўнай мэтай мерапрыемства стала ўмацаванне супрацоўніцтва паміж дзвюма краінамі ў сферы падрыхтоўкі высокакваліфікаваных спецыялістаў.
У беларускую сталіцу прыбыла шырокая дэлегацыя кіраўнікоў рознага ўзроўню сістэмы адукацыі Рэспублікі Узбекістан.
У рамках форуму былі абмеркаваны такія пытанні, як арганізацыя сумесных адукацыйных праграм, абмен студэнтамі і выкладчыкамі, прызнанне і эквівалентнасць дыпломаў, стварэнне сумесных лабараторый і даследчых цэнтраў.
Асаблівая ўвага была ўдзелена развіццю супрацоўніцтва ў галіне падрыхтоўкі спецыялістаў у сферы інфармацыйных тэхналогій, энергетыкі, сельскай гаспадаркі і іншых прыярытэтных галін.
Адным з найважнейшых вынікаў форуму стала падпісанне дагавораў і пагадненняў паміж шэрагам беларускіх і ўзбекскіх навучальных устаноў. У прыватнасці, рэктар Гродзенскага дзяржаўнага ўніверсітэта імя Янкі Купалы Ірына Кітурка падпісала дагаворы аб супрацоўніцтве з Нацыянальным універсітэтам Узбекістана імя Мірза Улугбека, Ургенцкім дзяржаўным універсітэтам.
1 мая дэлегацыя Купалаўскага ўніверсітэта на чале з рэктарам Ірынай Кітурка прыняла ўдзел у Міжнародным фестывалі "Навруз збірае сяброў". Конкурс на лепшую падрыхтоўку плова, канцэртная праграма, турнір па міні-футболе - усё гэта і многае іншае аб'яднала ўдзельнікаў фестывалю.
Так, падчас свята рэктар падпісала шэраг пагадненняў з вядучымі навучальнымі ўстановамі Узбекістана. Сярод іх: Ташкенцкі дзяржаўны тэхнічны ўніверсітэт імя Іслама Карымава, Каракалпакскі дзяржаўны ўніверсітэт імя Бердаха, Ташкенцкі дзяржаўны транспартны ўніверсітэт.
Гэтыя пагадненні прадугледжваюць сумесную рэалізацыю адукацыйных праграм, абмен выкладчыкамі і студэнтамі, а таксама правядзенне сумесных навуковых даследванняў. Першы беларуска-ўзбекскі форум прафесійнай адукацыі стаў важным крокам на шляху да пашырэння супрацоўніцтва паміж дзвюма краінамі ў галіне падрыхтоўкі спецыялістаў.
Падпісаныя дагаворы і пагадненні створаць трывалую аснову для рэалізацыі новых сумесных праектаў і развіцця акадэмічнага патэнцыялу Беларусі і Узбекістана.
Гродзенскі дзяржаўны ўніверсітэт імя Янкі Купалы