На адным дыханні, дынамічна, эфектна і з карысцю! У творчай атмасферы прайшоў чацвёрты тур конкурсу «Педагог-інаватар Купалаўскага ўніверсітэта».
Менавіта ў такім ключы правяла майстар-клас прафесар кафедры музычнага мастацтва Інэса Двужыльная. У цэнтры ўвагі - прынцыпы навучальнай адаптацыі замежных студэнтаў. Канкурсант прадставіла досвед правядзення заняткаў выкладчыкамі кафедры музычнага мастацтва з улікам культурных асаблівасцяў студэнтаў, іх моўных навыкаў, камунікатыўных практык. У рабоце з замежнымі студэнтамі важнае месца адводзіцца творчым мерапрыемствам, накіраваным на пашырэнне міжкультурнага дыялога.
Інэса Двужыльная адзначыла, што ў зносінах са студэнтамі прытрымліваецца трох галоўных правілаў: «Па-першае, бачыць у кожным асобу; па-другое, улічваць запыты маладых людзей, па-трэцяе, увесь час дэманстраваць належны ўзровень выкладчыцкай культуры».
Канкурсант расказала аб формах і прыёмах работы са студэнтамі з Кітая, якія садзейнічаюць іх асобаснаму і акадэмічнаму росту. Было падкрэслена, што падрыхтоўка магістарскай дысертацыі – асаблівы этап навучання, што кітайскіх студэнтаў трэба арыентаваць на дакладны і паслядоўны выклад уласных думак, актыўна ўводзіць музыказнаўчую тэрміналогію, якая сустракаецца на ўсіх занятках профільнага тыпу, удзяляць пільную ўвагу практычным аспектам доследнай тэмы.
Падчас майстар-класа Інэса Двужыльная прадставіла дапаможнік «Методыка і тэхніка навуковага даследавання», у якім адлюстравала аўтарскае бачанне падрыхтоўкі магістарскай дысертацыі. Дзякуючы дапаможніку, напісанаму адначасова на рускай і англійскай мовах, замежныя студэнты атрымліваюць пакрокавы алгарытм работы над навуковым даследаваннем, пачынаючы ад разумення сутнасці мэт і задач навуковай дзейнасці да практычных рэкамендацый па афармленні дысертацыі.
У майстар-класе прынялі ўдзел студэнты з Кітая, якія прадставілі вынікі навуковых пошукаў, а таксама выступілі з музычнымі нумарамі.
Чарговае мерапрыемства праекта «Адкрытае навучанне» запланавана на 3 красавіка. Аб выкарыстанні адукацыйнай аналітыкі ў практычнай рабоце педагога раскажа старшы выкладчык кафедры ўпраўлення і эканомікі вышэйшай школы РІВШ (г. Мінск) Дзмітрый Оськін. Падключэнне па відэасувязі ў аўдыторыі 334 галоўнага корпуса ўніверсітэта. Пачатак у 15.05.
Гродзенскі дзяржаўны ўніверсітэт імя Янкі Купалы