Старшы выкладчык кафедры хіміі і біятэхналогіі Алена Раманчук, дацэнт кафедры сістэмнай біялогіі Анастасія Саковіч, дацэнт кафедры матэматычнага аналізу, дыферэнцыяльных ураўненняў і алгебры Людміла Дзятчэня, а таксама загадчык кафедры агульнай фізікі Аляксандр Маскевіч прымалі ўдзел у складзе журы ў юбілейнай ХХ раённай навукова-практычнай канферэнцыі “Дарога ў будучыню”, якая праходзіла на базе ДУА “Доцішская сярэдняя школа” (Воранаўскі раён).
Важна падкрэсліць, што ў канферэнцыі прынялі ўдзел больш за 70 навучэнцаў з розных школ раёна. Актыўны ўдзел у працэсе дэманстравалі як малодшыя школьнікі, якія толькі пачынаюць свой даследчы шлях, так і старшакласнікі, ужо на фінішы свайго школьнага шляху.
Дзеці прадстаўлялі праекты, прысвечаныя самым розным тэмам, бо інтэлектуальныя спаборніцтвы праходзілі ў розных секцыях. Прыемна, што кіраўнікамі школьных навуковых прац выступілі ў тым ліку і выпускнікі ГрДУ імя Янкі Купалы.
Кожнаму дэлегату ў якасці падарунка былі ўручаны сімвалы юбілейнай канферэнцыі.
Гродзенскі дзяржаўны ўніверсітэт імя Янкі Купалы